Пĕрремĕш кризис пĕрлехи пурнăçăн виççĕмĕш çулĕнче палăрать. Эпир юрату тесе палăртакан ырă туйăмсем икĕ çултан ытла тăсăлмаççĕ. Каярах пурте лăпланать, кашни япала хăй вырăнне ларать. Хутшăнусем уçă та таса, кăмăллă формăна куçаççĕ. Анчах çакăнпа кашниех лăпланса ларма пултараймасть.
Мăшăр иккĕленме тытăнать — арăмĕпе упăшки хушшинче юрату пулнах-ши е вăл тĕлĕкри евĕр кăна курăннă? Çак самантра упăшки те васкавлă улшăну шырать. Çакăнта тупăнать ĕнтĕ хальхи пек марри, виççĕмĕшĕ — еркĕн.
Шăпах çичĕ çул пурăннă хыççăн та çакăн евĕр ÿкерчĕкех тухса тăрать. Хăш-пĕр мăшăрсем пĕрремĕш кризиса çăмăллăнах чăтса ирттереççĕ (уйрăмах ку вăхăтра ачасем çуралсан). Анчах иккĕмĕшĕнче вара аптраса ÿкеççĕ.
Анчах виççĕмĕш кризис чи йывăрри шутланать. Вăл 17—20 çул пурăннă хыççăн пырса çапать. Ачасем ÿссе çитсе килтен тухса кайнă. Пĕр шутласан, ашшĕ-амăшсен хăйсем пирки çеç шутламалла пек. Анчах кунта çакă сиксе тухать: халь тин пытарăнчăкра пурăннă тĕллевсене пурнăçлама кая юлнă. Кашниех хăйне лăплантарма тата кăтартса пама тăрăшать: умра малашлăх пур.
Мĕн пур çак тĕслĕхсенче мăшăра улталани (уйрăмах арçынсемшĕн) хăйне май çăлмалли тата хăтармалли мел пулса тăрать.
Упăшкан ултавĕ хĕрарăм-шăн та тĕнче пĕтни мар. Енчен те вăл шăв-шав çĕкличчен сĕтел хушшине ларса мĕн пулни пирки пуç тавра шутласа илет пулсан. Шăпах çакăн евĕр лару-тăрура хĕрарăмсем çухалса каяççĕ, мăшăрне икĕ-виçĕ ăшă сăмах калама чухлаймаççĕ. Лешсене вара вăл ку чухне питех те кирлĕ.
Мăшăрĕ улăштарни ăслă-тăнлă хĕрарăма хăй тавра тимлĕ çаврăнса пăхма хистет: çак хуйхă-суйхăра пĕр ен кăна айăплă-ши?
Психологсем çапла сĕнеççĕ: эсир мĕн пулса иртнине чăнахах пĕлетĕр пулсан, нихăçан та чунăрсене уçса ан калаçăр. Сирĕн çемьере нимĕн те пулман пек тăвăр. Пĕр-пĕрин хушшинчи хутшăнусене сÿтсе явса палăртиччен сирĕн мăшăр çакна аван куртăр: аякринчен лайăххи килтех пур иккен, çитменнине унтан та аванрах…